--------------------------------------------------------------------------------
السلام عليكم
قصيدة لشاعر مبدع قريتها من زمان وحبيت اجيبها هني لكم (مستور المالكي وقصيته المجنونه زائرة اليل)
يا محمد غبت عنها اسبوع من باب التغلي
ودي اعرف واكتشف عن حبها لي واختبرها
يا محمد سبعة ايامٍ عجاف ابدون خلي
شفت فيها الويل واعيوني ملا زمها سهرها
سبعة ايام الكدر ما راح عني مثل ضلي
شلت كل اهموم خلق الله وعايش في كدرها
ادري ان الصبر مفتاح الفرج وبه امتحلي
مير هي عنها حرم باجماع كل اللي نظرها
رحت ادور للتسلي وين ابلقاه التسلي؟؟
اخرج امن البيت والقى نفسي ابرم في قطرها
طفت شارع بيتهم ما غير مقبل به مولي
الشوارع مظلمه والقى بشارعهم سفرها
ودي اسمع ذكرها لو من عذولاً بالتبلي
مو مهم اللي يقوله والمهم انه ذكرها
شفت اخوها صدفةٍ واقفي يرحب بعض كلي
بعضي الثاني همس بذني تنشد عن خبرها
قمت اهلى به وانا خايف لساني لا يزلي
شفت شعره في ثيابه 0 قلت هاذي من نثرها؟؟؟
وانكسف مني 0تبسم لي 0وناظرني بغلي
قال توي كنت بالصالون والناس اشكثرها
قلت فعلاً شفت هالصالون بالناس امتملي
والله انه يكذب الكذاب وانه من شعرها
اعرفه من ملمسه من ريحته من لونه اللي
مثل لون العود حمره من سوادٍ يشتقرها
شلتها بالدس في جيبي وانا ما اشفيت غلي
ودي استمتع بملمسها وريحاً من زهرها
قمت ودعته وليلتها عذابي مستغلي
طول ليلي حاضن الشعره واناجي في صورها
سبعة ايامٍ وانا في داخلي ربطٍ وحلي
اعزم الفيها وأهون خايف آسبب ضررها
بعد سابع يوم من همٍ بقلبي مستحلي
اتصل بي واحدٍ ساكت ونفسي في ضجرها
قلت الو وشفيك ساكت رد يا جعلك تغلي
كنى اسمع صوت ليمونه بفمه يعتصرها
واهمست وش سهّرك للحين في وقت امتتلي
قلت طيفك نعلبو جدك وضحكت من فخرها
واهمست هلحين اجي واخبرك عن دقي وجلي
قلت معقوله؟ !!! وقالت نار شوقي ما اقتدرها
جت وهي متخفيه صبحٍ بليلٍ مستظلي
كنها تحسب خطاها مير يفضحها عطرها
نفحها مسكٍ ونثر انفاسها وردٍ وفلي
المكان اللي تعدي منه يبقى فيه اثرها
جت تبختر ردف يتمايل وردفٍ يستقلي
كنها ترقص على تكة خطاها من بطرها
عنجهية صدرها تفتك بخصرٍ مضمحلي
لا تثنت تنقسم نصين من خصرٍ بترها
لبسها الجذاب حدد جسمها سنتي وملي
زادها فتنة حلا وإنما فضحها ما سترها
قمت ماني في شعوري كل مافيني يهلي
كنها المتفضله بانقاذ روحي من بحرها
طوقت عنقي بسيفٍ من سواعدها يسلي
واغرست رمحين في صدري ولجّمني ثغرها
ترتجف في قلبها خوفٍ توالها تولي
تنفض ايديها ويتقطع نسمها من حذرها
كلما هز الهوى الشباك واحدث فيه خلي
بسملت واتفزّزت تحضن يديها في صدرها
قالت انت اشفيك متغيّب جفا وإلا تخلي؟؟
قلت لا هاذي ولا هاذي ولا حتى قدرها
مير انا كثرت جياتي وخفت انك تملي
سلهمت بعيونها عضت عنبها من قهرها
واخبطت بكفوفها صدري ودمعتها تهلي
قالت اقسم لك برب البيت شوفتك انتظرها
قلت اجل وش وخرك وانتي لعنواني تدلي؟؟
لا يكون انه جفا؟؟قالت حشا وارخت نظرها
انت تدري عن ظروفي حط نفسك في محلي
بنت مثلي خارجه من بيت اهلها وش عذرها
لو قدرت اليوم اجي والقى عذر مقنع وحلي
مامعي في كل يومٍ حجةٍ لهلى ابتكرها
جادلٍ من نسل شيخٍ لا يهاب ولا يذلي
فاتنه واجمل بنات الكون ماتسوى ظفرها
العفاف ابوجهها مستقبل القبله يصلي
والكسل برموشها جالس يحذر من خطرها
وجه مثل الصبح يتنفس بنورٍ مستهلي
والرموش الليل عسعس ليلةٍ محلى سمرها
طرفها في حد ذات الطرف عالم مستقلي
به نهار وليل ، به بحر وسما داخل حورها
جيدها الفتان نوراً من زجاجٍ مستجلي
لو لمسه ابهامها بصمته تبقى في بشرها
من شفافية جسدها والنعومه والتجلي
أي شياً تشربه ينشاف نازل من نحرها
ظامها شلال دهن العود بالجيد امتدلي
الوحيد اللي جبرها تنفعل محدٍ جبرها
صار يتمرد يعذبها تلمه ثم فلي
ثم ترجع تلفحه ويعود ما يسمع لمرها
ابتسامتها وميض البرق في نوٍ مطلي
والشفايف كنها قوس القزح لونه غمرها
ضحكها معزوفةٍ يطرب لها قلبٍ يولي
وامنياتي ماجنه ترقص على نغمة وترها
إن حكت نفثاً من السحر الحلال ولا يحلي
تستميل اقلوب من يسمع كلامٍ من دررها
لا دنت مني تبعثرني على غنجٍ ودلي
وانصهر بنفاسها وإحساسي المرهف صهرها
عينها مستسلمه والرمش طايح مستذلي
طاح طيحة فارسٍ رمحه بعدوانه كسرها
والله إن اللي ببالك يا محمد ما حصل لي
ذبت واروتني عفاف وكل مافيني شكرها
ما منعني غير طيب اصلي ولي قدر امتعلي
واللي ادهى من كذا خفت اني انزل من نظرها
قمت اودعها وانا شوقي يزيد ولا يقلي
لحظةٍ هدت فرح ساعه وبالكود افتكرها
اوجبت غسلاً على عيني بدمعٍ مسفهلي
قبل تبلغ حلمها والرشد واتمتع بصرها
بعدما عاهدتها بالله حرمت التغلي
توبه اتغلى ونار افراقها مقوى سقرها
الإثنين سبتمبر 29, 2008 9:46 pm